Sot u përmbyll me sukses programi 20-ditor i trajnimit për aftësim profesional në sektorin e blegtorisë, i akredituar dhe i validuar nga Autoriteti Kombëtar i Kualifikimeve. Në këtë program morën pjesë gjithsej 15 kandidatë, prej të cilëve 8 nga Komuna e Skenderajt dhe 7 nga Komuna e Malishevës.
Të gjithë pjesëmarrësit përfunduan me sukses trajnimin dhe u certifikuan me titullin “Teknik i Blegtorisë”, sipas Nivelit III të Kornizës Kombëtare të Kualifikimeve.
Programi modular i trajnimit në sektorin e blegtorisë, profili “Gjedhët”, përbëhej nga 7 module me gjithsej 140 orë mësimore, ekuivalente me 7 kredi. Nga fondi i përgjithshëm i orëve, 70% u realizuan përmes mësimit praktik, ndërsa 30% përmes mësimit teorik.
Gjatë ceremonisë, me kandidatët e certifikuar u nënshkruan edhe marrëveshjet për përfitimin e granteve. Ky aktivitet u realizua në kuadër të projektit “Përmirësimi i Punësimit dhe Mundësive për Gjenerim të të Ardhurave në Zonat Rurale”, i financuar nga organizata Bread for the World nga Gjermania dhe i bashkëfinancuar nga komunat partnere.
Të pranishëm në ceremoninë e ndarjes së certifikatave dhe nënshkrimit të marrëveshjeve ishin z. Zenel Bunjaku, Drejtor i organizatës IADK, z. Sabit Ferizi, Drejtor për Bujqësi, Pylltari dhe Zhvillim Rural në Komunën e Skenderajt, si dhe z. Sylë Dukolli, Drejtor për Bujqësi, Pylltari dhe Zhvillim Rural në Komunën e Malishevës.
Trajnimi i realizuar dhe mbështetja përmes granteve synojnë avancimin e praktikave të mbarështimit të gjedhëve, përmirësimin e kushteve higjienike në fermë, rritjen e cilësisë dhe sasisë së qumështit, zbatimin e praktikave të duhura të ushqyerjes së lopëve qumështore, si dhe përmirësimin gjenetik të racave. Këto ndërhyrje do të kontribuojnë në rritjen e produktivitetit dhe gjenerimin e të ardhurave më të larta për fermerët përfitues.
